IGACOS, Davao del Norte -- Gipangita sa kapulisan ang usa ka lalaki nga nanunggab og waitress sulod sa videoke bar sa Purok-1B, Sitio Maag, Barangay Penaplata, Island Garden City of Samal (Igacos) alas 9 sa gabii, niadtong Sabado, Septyembre 21.

Ang suspek giila nga si Marlon Navaro, 27, dunay kapuyo, construction worker ug molupyo sa Purok-3B, Paraiso Village, Barangay Cawag, Samal District.

Sa report nga nakuha gikan sa Davao del Norte Police Provincial Office, nasayran nga giluba sa suspek ang waitress sa Stick House Videoke Bar nga ginganlan og Sharon Saniel, 36, dalaga.

Base sa inisyal nga imbestigasyon, nga ang suspek nga si Navaro mibiya sa maong bar human wa tuguti sa kahera nga mo-order pa og beer.

Apan nibalik ug samtang ang biktima nga si Saniel atua sa gawas sa bar kalit nga giluba sa suspek gamit ang mahait nga hinagiban tumong sa tiyan.

Human sa gihimong krimen, suspek nagdaling nisibat.

Samtang ang biktima gidali pagdala ngadto sa Davao del Norte Hospital apan wa madugay gibalhin ngadto sa Southern Philippines Medical Center sa Bajada, Davao City. (Dexter T. Visitacion)