MIBUNGKAG sa kahinanok sa mga residente ang pag-ulbo sa dakong kalayo nga milamoy sa 42 ka mga balay sa Purok 9, Southbay, Barangay Lapu-Lapu, Agdao District, Davao City Dominggo, Septiyembre 27, 2020.

Alas 12:20 sa tungang gabii sa Dominggo nagsugod ang pag-ulbo sa kalayo sa usa sa mga balay sa dapit nga giingong dunay natumba nga lampara.

Sanglit gama sa mga light materials ang mga kabalayan sa dapit, daling miganit sa mga balay sa silingan ang kalayo.

Dali sab nga miresponde ang kabomberohan sa siyudad hinungdan nga dul-an sa oras lamang napalong ang kalayo.

Padayon pa nga nagsuta ang Davao City Fire District unsay matuod nga hinungdan sa kalayo ug pila ang kantidad sa nahimong danyos niini.