PADAYON ang makuti ug lawom nga imbestigasyon sa homicide and arson section sa kapulisan sa San Pedro Police Station ubos sa Davao City Police Office (DCPO) sa kamatayon sa usa ka law student.

Alas 9 sa gabii niadtong Sabado, Disiyembre 19, 2020, nakit-an ang patay’ng lawas sa biktima nga si Enrilie Andalique, 36, ulitawo, empleyado sa Municipal Trial Circuit Court (MTCC) ug nag-abang og lawak sa Rizal Extension, Barangay 38-D Poblacion Davao City.

Ang biktima gituohang anaa na sa ikatulo ka adlaw gikan pagpatay kinsa nagbuy-od sud sa iyang giabangan nga boarding house ug naligo sa dugo, daghan og dinunggaban sa lawas ug dunay agi nga hinigtan sa bakos sa liog.

Sa impormasyon gikan kang DCPO Spokesperson Police Captain Rosario Aguilar, robbery ang gitan-aw sa pagkakaron nga motibo sa kremin.

Sa usa ka post sa Facebook, dunay nagkomento nga netizen kinsa nagpasalamat sa kabuotan sa biktima gumikan dali lang kining maduolan.

“RIP sir, nadaganan paka namo sa una year 2017 tong need namo og cash giprenda namo amo ATM dako jud tong tabang sir huhuhu justice for the family may you rest in peace sir,” sa usa ka komento sa netizen kinsa nagpaabot sa pahasubo.

Narekober sa Scene of the Crime Operatives ang usa ka kotsilyo nga dunay gitas-on nga 30 centimeters ug bakos.

Ang patay nga lawas sa biktima naa sa morgue sa Angel Funeral Homes samtang gihulat ang kabanay niini.

“Lawom nga imbestigasyon ang atong gipahigayon karon pinaagi sa PS2, aron maila ug masikop ang posibleng suspek sa kremin,” ingon ni Aguilar.