SUBLING nagpahimagno ang Municipal Inter-agency Task Force (MIATF) sa Bansalan, Davao del Sur sa publiko nga tumanon gyud ang minimum health protocols aron malikay sa coronavirus disease (Covid-19).

Sa uwahing datos sa MIATF, siyam na lang ang kulang aron mopatong sa 100 ang kaso sa nataptan og coronavirus sa lugar.

Nasayran nga walo ka indibidwal ang nag-positibo sa coronavirus niadtong Nobyembre 28, hinungdan nga anaa na sa 91 ang kumpirmadong kaso sa lugar.

Sa maong ihap, 25 niini ang aktibo ug 66 ang nakarekober, ug nakatala na usa ka namatay sa maong kagaw ang lungsod.

Laing lima pa ka mga suspek ang gibantayan sa MIATF samtang 267 ang gipailawom sa strict home quarantine.

Usa ka lalaki ang gihulagway nga “dead on arrival” sa usa ka pribadong ospital niadtong Sabado.

Wa na mihatag og dugang detalye ang MIATF, apan gi-ingong nataptan ang maong lalaki sa iyang asawa nga na-admit sab sa usa ka pribadong ospital.

Nanawagan ang MIATF sa publiko nga kon mahimo likayan ang pag-adto sa bisan asang lugar kon dili importante ang katuyuan ug mas maayong magpondo sa panimalay aron malikay sa sakit.

Gipahimagnoan sa MIATF ang publiko nga di balewalaon ang Covid-19 samtang nagpadayon ang local transmission. (Orlando B. Dinoy)