MAGSAYSAY, Davao del Sur -- Hugtanong gilimod sa pamilya sa usa ka 68-anyos nga lalaki kinsa nabaniog nga gi-atake sa sakit sa kasing-kasing human nasirado ang gi-apilan nila nga investment scheme.

Unang nabaniog nga namatay si Dionisio Cabaral, molupyo sa Barangay Isidro ning lungsod, nga giatake human gipasirad-an sa gobyerno ang Kapa (Kabus Padatoon) Community Ministry International Inc.

Sa pagpanubay sa SunStar Superbalita Davao sa mismong balay niini Dominggo sa buntag, Hunyo 16, gilimod sa pamilya ang mikatap nga hungihong.

Sumala ni Rafaela, 80-anyos, asawa sa namatay, nga nakadungog sila sa maong balita apan matod niya nga dili investment scheme ang hinungdan sa atake sa iyang bana.

Hinuon, giangkon niini nga nakabutang iyang bana og P40,000 niadtong Mayo 8 sa Rigen Wellness Products Marketing, apan baliwala lang kanila kung maka-payout o dili kay naanad na sila sa sugal.

“Mapilde gani mi anang sugal sa bugno sa kabayo unya nalugi pud mi og P80 mil dihang na-failure ang among gi-sprayhan nga mangga,” asoy niini.

Sumala ni Rafaela nga naglain na ang paminaw sa iyang bana niadtong Hunyo 9 apan nadala dayon kini sa Southern Philippines Medical Center (SPMC) sa Davao City.

Buntag sa Hunyo 11, gibawian sa hinulamang kinabuhi si Dionisio sud sa tambalanan.

Giangkon ni Rafaela nga nakabalo sila nga gironda sa mga sakop sa National Bureau of Investigation (NBI) ang Kapa apan alang niya wa niya nakita nga naapektuhan niini ang iyang bana.

“Sugarol man gyud na siya mao nga naanad nana siya nga mapildi, ang iyang igsuon hinuon ug pag-umangkon mao to’y miyembro sa Kapa pero wala ra man sa iyaha kay sugal gud ng investment scheme,” tataw ni Rafaela.