BANSALAN, Davao del Sur -- Gisikop sa kapulisan ang usa ka 26-anyos nga lalaki human gireklamo nga nangulata sa iyang menor de edad nga kapuyo hinungdan nga nakuhaan sa iyang gisabak ang biktima.

Si Police Major Rodante Varona, hepe sa Bansalan Municipal Police Station, nagbutyag nga nasikop ang suspek sa Sitio Mainit, Barangay Kapatagan, dakbayan sa Digos.

Ang suspek giila ni Varona nga si Rene Monsad Tioga, molupyo sa Barangay Managa sa lungsod.

Nag-alayon ang puwersa sa Bansalan MPS ug mga sakop sa 1104th Mobile Company ug Regional Mobile Force Battalion sa pagsikop sa suspek, alas 3:45 sa hapon niadtong Lunes, Agosto 12.

Sumala ni Varona nga gilagdaan ni Regional Trial Court Branch 21 Presiding Carfelita Cadiente-Flores ang orden de aresto batok sa suspek kinsa nag-atubang og kasong paglapas sa Seksyon 10 (A) sa Republic Act 7160 kun Child Abuse.

Temporaryong gikustodiya sa Bansalan MPS ang suspek samtang wa pa’y gipaguwang commitment order ang korte. (Orlando B. Dinoy)