PATAY na nga niabot sa ospital ang mag-amahang edaran kinsa gipanggulgolan og liog samtang nangatulog alas 12:20 sa tungang gabii niadtong Lunes, Disyembre 2, sa Capitol Hills, Barangay Central, Mati City, Davao Oriental.

Mga biktima nailhang sila Wenceslao Laurea Noval Sr., 74, retiradong personahe sa Department of Agriculture Reform (DAR) sa Davao Region ug ang anak niining si Wenceslao Jr., 50-anyos, pulos nagpuyo sa Purok Panghusay, Capitol Hills sa nasampit nga barangay.

Migula sa imbestigasyon nga nianang Disyembre 1, alas 11:45 sa gabii, puwerteng hinanuka sa duha ka biktima nga nangatulog sud sa ilang balay.

Giingon nga usa ka wa mailhing suspek ang misulod sa balay ug dayong gipangtigbas ang duha tumong sa nagkadaiyang bahin sa lawas.

Wala pa makontento ang suspek, iya pang gipanghiwa ang liog sa duha ka biktima nga miresulta sa ilang hinanaling kamatayon.

Gisulayan pa og dala ngadto sa Davao Oriental Provincial Hospital ang mga nahisgutan apan gideklara silang wala nay kinabuhi.

Blangko pa ang kapulisan sa motibo sa krimen, apan usa ka makuti ug lawom nga imbestigasyon ang gilusad sa Mati City Police Station labot sa hitabo.

Patay’ng lawas sa mga biktima gipanghaya na ning pagsuwat sa balita Miyerkules.