NAGBAHAD karon ang pamunoan sa Criminal Investigation and Detection Group (CIDG)-Regional Field Unit (RFU) – Davao nga dili gayod nila palabyon ang mga negusyante nga nag-abuso sa presyo sa mga nag-unang palaliton nga pambatok sa coronavirus disease (Covid-19).

Kini ang gibutyag sa CIDG-RFU-Davao human sa gilusad nga buy bust sa Sta. Ana Police Station.

Ang buy bust miresulta sa pagkasikop sa usa ka Joy Marie Escobillo Perez, 47-anyos, minyo, negusyante ug tag-iya sa Coson Pharmacy 883 ug nagpuyo sa Block 7, Lot 3, Country Homes, Cabantian, Davao City.

Nasikop ang suspek alas 6:15 sa gabii niadtong Huwebes, Marso 27, 2020 uban sa koordinasyon sa Food and Drug Administration (FDA) Davao.

Sumala sa awtoridad nga positibo nga mobaligya ang suspek ngadto sa nagtakuban nga kapulisan subay sa paliton niini nga usa ka 4000 ml nga 70 percent ethyl alcohol nga nagkantidad og P980.

Giingon nga taas kini nga presyo itandi sa regular nga presyo nga anaa sa FDA Circular No. 2020-005.

Sa maong hitabo, gilayong mikasa og operasyon ang awtoridad ug dihang sa pagdawat sa suspek sa marked money ug naka-isyo na kini og Cash Invoice No. 23029 sa pagbaligya, gilayon siyang giposasan sa awtoridad.

Nakuha sa posisyon sa dinakpan ang mga mosunod; usa buok sa 4000 ml 70 percent ethyl alcohol; (36) buok sa 4000 ml 70 percent ethyl alcohol; ug 44 buok sa 750 ml 70 percent isopropyl alcohol nga mapalit sa P400 diin nasuta nga “overpriced items” kini nga kantidad sa street market value nga P53,860.

Adlaw’ng Sabado, ang suspek gibalhog sa selda sa kapulisan ug ipailawom sa summary inquest procedure kung maandam na ang mga papeles aron sa pagpasaka og kaso may kalapasan sa Republic Act (RA) 10623 as amended sa RA 7581 ug RA 11469. (Jeepy P. Compio)