KIDAPAWAN CITY -- Tingkagol sa prisohan ang usa ka lalaking suspek sa pagrapido ug pagdunggab sa mag-uuma alas 3:45 sa hapon, Huwebes, Abril 8.

Naila ang biktima nga si Leonardo Carob, 51 anyos, minyo ug nagpuyo sa Barangay Malingin, Libungan, North Cotabato.

Ang suspek mao si Ariel Entera, 25, minyo, nagpuyo sa Barangay Guiling, Alamada sa nahisgutang probinsiya.

Sumala kang North Cotabato Police Provincial Office Director Colonel Henry Villar nga gikan sa uma ang biktima ug pauli na unta sa ilang balay.

Sa pag-agi niini sa balay sa suspek, nagkalalis sila gumikan sa utlanan sa yuta nga ilang giugmad.

Nagbinayloay og mga mahait nga pulong nga misampot sa grabeng kasuko ni Entera hinungdan nga gikuha niini ang gitagoang 12 gauge shotgun ug girapido si Carob.

Sa dihang nahagba sa yuta, gitusak-tusak kini sa suspek og dunggab ug namatay.

Hinuon, dali rang nadakpan si Entera sa mga nagresponde nga mga Barangay Peacekeeping Action Team ug gitunol ngadto sa kapulisan sa Alamada Municipal Police Station. (Edgar E. Fuerzas)