USA sa panginabuhian sa residente sa lungsod sa Malita sa Davao Occidental mao ang pagpanguma ug pagpanagat.

Atol sa pagbukas sa Davao Occidental General Hospital sa nakalabay nga semana, dako ang pasalamat sa mga residente gumikan kay di na sila gikinahanglang moadto sa Davao City aron dalhon ang ilang mga pasyente.

Nanawagan sab sila mahatagan sab sila sa gobyerno og mga makina sa ilang bangka ug kahayupan nga maoy ilang padaghanon.

"Kini kay nakita naman gyod sa gobyerno among panginahanglanon diri sama aning hospital, unta naa sab programa ang gobyerno nga ang naa sa hilit nga mga dapit dalhan kami og panginabuhian sa panguma ug sa among pangisda, naa naman pero nindot pa gyod og madugangan kay kulang gyod," ingon ni Merla Sagunting, 58-anyos taga Barangay Lacaron kansang bana usa ka mananagat.

Alang sab sa usa ka mananagat nga si Ricarte Ungad, 55-anyos, taga Barangay Talocanga, Malita, "Naay proyekto ana sauna, pero nawala man to, unta mabalik. Para pagamit gyod namong mga mangingisda, makina among kinahanglan, ug mga bangka."

Luyo niini, mipadayag sab og mga plano si senatorial aspirant ug kanhi Agriculture Secretary Emmanuel Manny Piñol nga gikinahanglang mabalik sa hinayhinay ang ekonomiya ug ipresentar ang usa ka direkta nga solusyon sa problema.

"I would call that understanding the 4Ws - What, When, Where, Why -- to confront the crisis and initiate the recovery. There is, however, a more difficult question which needs to be answered -- how," sumala ni Piñol.

Si Piñol nagkanayon nga ilang gipresentar ang klaro nga suporta sa agrikultura, esensya sa food production, pagmugna og trabaho ug pagpausbaw sa micro, small and medium enterprises (MSMEs) nga batakan nga nalambigit sa food processing ug value-adding sa mga produkto sa agrikultura.

Ang Pilipinas usa ka agrikultural nga nasud nga adunay 30 milyon nga ektarya nga yuta, 47 porsyento niini yuta nga pang-agrikultura samtang ang nasud sab maoy usa sa nag-unang mga nasud nga nagprodyus og isda sa kalibutan.