NAANGOL ang usa ka mag-uuma human maunay sa gidalang bomba alas 12:40 sa udto niadtong Martes, Energo 7, 2020 didto sa North Upi, Maguindanao Province.

Giila ang biktima nga si Jorry Marabong, 37, minyo ug molupyo sa Barangay Rempes, North Upi.

Sa taho gikan sa Maguindanao Police Provincial Office, nasayran nga nangayam og ihalas nga baboy ang biktima gamit ang improvised explosive device (IED) sa lasang nga bahin sa Barangay Rempes.

Sa dihang gibutang na ni Marabong ang bomba sa agianan sa mga baboy, aksidente kining mibusikad hinungdan nga nalagpot siya tungod sa kakusog sa impak human maunay sa laang sa pagpangayam.

Gisapupo sa iyang mga kauban nga silingan si Marabong ug gihatud sa Upi District Hospital, apan gibalhin sab dayon sa iyang pamilya ngadto sa Cotabato Regional and Medical Center sa Cotabato City.

Sumala pa nga naa sa grabeng kahimtang ang biktima human makaangkon og mga samad sa nagkadaiyang bahin sa lawas gikan sa mga tipaka sa IED.