GIKUSTODIYA karon sa Toril Police Station ang usa ka lalaki kinsa nagpailang area manager human nadakpan dihang gibiyaan niini ang gimaneho nga mahalong sakyanan.

Miyerkules sa buntag, Abril 7, 2021, nasikop ang suspek kinsa padayong giimbestigahan human nakumpiska sud sa iyang sakyanan ang daghang pinaugang dahon sa marijuana.

Una niini, misibat ug gibiyaan sa suspek ang sakyanan dihang iyang nakita nga hugot ang gihimong pag-inspeksyon sa mga sakop sa Task Force Davao sa may Sirawan, Toril.

Sud sa sakyanan, nakuha ang mga identifications cards (IDs) nga nagdala sa pangalang Zyrone Rois Manansala.

Narekober sab ang daghang putos sa pinaugang dahon sa marijuana ug usa ka listahan nga anaa, suma pa, ang ngan sa hatdan niini.

Padayong gipanubayan sa kapulisan ang maong hitabo samtang temporaryo nga gikustodiya ang suspek sa Toril police. (Jeepy P. Compio)