GOVERNOR GENEROSO, Davao Oriental -- Dead on the spot ang usa ka mangingisda human tigbasa sa iyang higala nga mangingisda sab alas 3:30 sa hapon, Abril 6, 2022, didto sa Purok 2, Barangay Tagabebe.

Ang biktima giila ni Police Captain Ramil Rivera, chief of police sa Governor Generoso Municipal Police Station nga si Nelson Mohammed, 18-anyos, residente sa maong lugar, samtang ang suspek mao si Alemar Dela Crus Amad, 28-anyos, taga Purok 1, Barangay Pundaguitan sa nasampit gihapon nga lugar.

Sumala ni Police Captain Rivera nga subay sa imbestigasyon, mitambong sa birthday party sa ilang higala nga si Vincent Arlalejo, ang biktima, kauban ang suspek kinsa hubog nang miabot.

Gilayong nagkalalis ang biktima ug ang suspek hinungdan nga giulang ni Vincent diin ang biktima gidala kini sa ilang kusina ug nakatulog.

Mibiya dayon si Vincent, apan pagbalik niini, nagkadugo ug wala nay kinabuhi ang biktima kinsa dunay dako nga samad sa liog ug dughan.

Ang suspek human sa hitabo, daling miuli sa ilang balay ug nakatulog, diin naabtan sa mga pulis kinsa nagkadugo pa.

Giproseso na sa kapulisan ang pagpasaka og kaso batok sa suspek.