NAGMINGHOY ang usa ka 50-anyos nga biyuda human giingong nailad sa usa ka nagpailang foreigner kinsa nagpasalig nga magminyo sila.

Nagpatala sa buhatan sa Sta. Ana Police Station ang usa ka Rosana (bansagon gitago), biyuda ug taga Barangay San Antonio, Agdao District, dakbayan sa Davao.

Gisaysay ni Rosana ang nahitabo kaniya diin giingong naa siya’y nakaila nga foreigner pinaagi sa Facebook.

Dihang milungtad na og usa ka bulan ang ilang pag-chat sa usa’g-usa, miingon suma pa ang langyaw nga gusto niyang naay mopadagan sa iyang katigayonan nga iyang plano nga itukod sa Pilipinas.

Misalig sab si Rosana sa mga matam-is nga pulong sa langyaw nga gusto niini nga mag-minyo silang duha.

Gibubo sab ni Rosana ang iyang pagsalig sa langyaw ug miabot ang panahon nga mihangyo ang langyaw nga magpadala og kuwarta aron sa ingon mogawas ang iyang dako nga kuwarta sa bangko sa abroad.

Sa sige’g padala og kuwarta ni Rosana, mikabat na kini sa P4 milyones, diin sa dihang nangisog na kini sa pagpangutana kung kanus-a moanhe ang langyaw sa Davao, kalit lamang siyang gi-block sa FB ug dili na matawagan ang iyang numero sa cellphone.

Perteng minghoya sa biyuda, ug sa miaging adlaw lamang niya nahunahunaan nga nailad siya sa langyaw hinungdan nga iya na lamang kining gipa-blotter sa kapulisan.