KIDAPAWAN CITY -– Mikaratil og panagan ang mga nagsabong nga gironda sa awtoridad alas 10 sa buntag niadtong adlaw nga Sabado, Marso 28, sa probinsiya sa Cotabato.

Mismong si Tulunan Cotabato Mayor Pip Pedregosa Limbungan ang nakadawat og taho nga dunay tari-tari sa hilit nga dapit sa Brgy. Popoyon Tulunan ug utlanan sa Barangay Damawato, Datu Paglas, Maguindanao.

Abtik nga gi-raid sa mga pulis sa Tulunan uban ang mga opisyal sa barangay ang sabong-sabong sa maong dapit.

Apan nakabantay ang mga nagtari sa nagsingabot nga awtoridad, hinungdan nga mikaratil sila og panagan.

Narekober sa mga pulis ang 12 ka motorsiklo, usa ka pula nga manok nga samaron, usa ka bike, usa ka ID nga quarantine pass ug mga tsinelas nga nagkabitas-bitas.

Hugot nga gidili ang tari-tari dungan sa gipatuman sa probinsiya nga enhanced community quarantine gumikan sa hulga sa Covi-19.

Gipursige ni Mayor Limbungan ang pagpasaka og kaso sa mga nagtari-tari sa Brgy. Popoyon Tulunan.

Sa kasamtangan ang kapulisan sa Tulunan ang padayon nga nag-imbestiga kalabutan sa maong hitabo. (EEF)