GIPAPRISO sa usa ka bana ang iyang misis ug ang giingong kabit niini human nasakpan sa bana ang misis nga mibalhin na og puyo sa balay sa naulahi.

Gikan sa Maramag, Bukidnon, mibiyahe lang padung sa Davao City ang bana nga si Jestoni Calimpas Dael, 30 anyos, mekaniko, aron sutaon ang asawa niini nga si Karen Joy, kinsa milakaw sa ilang balay Disyembre 19, 2019 nga wala nananghid kaniya.

Subay sa blotter nga natala sa Talomo Police Station, nasayran nga niadtong Enero 2, 2020, si Karen Joy giuban niini ang ilang anak nga 6 anyos gikan sila sa balay sa iyang inahan sa Kadingilan, Bagong Bayan, Bukidnon ug milakaw sila sa Davao City.

Sa pagpanubay sa bana, gipangita niya ang asawa sa Facebook diin daw nahugno ang iyang kalibutan dihang iyang nakita sa mga piktyur nga na-post sa Facebook, ang iyang asawa nga hastang pagka-sweet uban sa kabit nga nagpuyo sa Altesa Heights, Catalunan Grande, siyudad sa Davao.

Apan sa pag-adto sa bana sa dapit, giingon nga namalhin na sila didto sa Granville 3, Catalunan Pequeño, hinungdan nga giadtoan sa bana.

Nagdala og mga dokumento ang bana nga nagpamatuod nga iyang anak ang 6 anyos ug marriage contract nga nagpamatuod nga kasal sila.

Niadtong Sabado, alas 11:15 sa gabii, sakay sa mobile patrol 71 sa Talomo police, giubanan ang suspek padung sa Granville 3 diin didto nakita niya ang iyang asawa uban sa giingong kabit niini nga si Emilio Serundo, 33 anyos, construction worker.

Walay duha-duha nga mipadakop ang bana sa iyang asawa uban ang kabit niini kinsa temporaryo karon nga gipangkustodiya sa Talomo Police Station.