PADAYONG gipangita sa awtoridad ang iresponsable nga inahan nga mibilin sa iyang bag-ong himugso nga anak kilid sa kanal Dominggo sa kaadlawon, Hulyo 25, 2021, didto sa Barangay Panacan, Davao City.

Sumala ni Terso Mercado, chief operation sa Panacan Volunteers Responders Search and Rescue, nga anaa na sa luwas nga kondisyon ang bata ug anaa na sa pagkustodiya sa City Social Welfare and Development Office.

Una niini, nakit-an sa usa ka residente sa dapit ang masuso nga walay sinina ug dunay samad ug nagkadugo ang ngabil nga anaa kilid sa kanal.

Luspad na suma pa ang masuso ug dunay pinaakan sa insekto ang lawas, butang nga dali kining giluwas ug gilayon miabot ang Panacan Volunteers Responders Search and Rescue.

Sa kasamtangan, padayon ang imbestigasyon sa kapulisan aron mailhan ang inahan nga mibilin sa iyang anak kilid sa kanal. (Jeepy P. Compio)