LAAK, Davao de Oro -- Luyo sa paningkamot nga mapanalipdan ang lungsod sa hulga sa coronavirus disease (Covid-19), wa makalikay sa gikalisangang sakit ang laing mayor ning probinsya.

Si Mayor Antonio L. Libuangan sa Lungsod sa Laak ang ikaduhang mayor nga nabiktima sa sakit, ikaduha sa mayor sa Lungsod sa Montevista nga si Mayor Eutropio Jayectin.

Sa opisyal Facebook page sa LGU-Laak, gipamahayag ni Libuangan nga subo mang ipahibalo apan luyo sa maong negatibong balita, walay rason nga itago ang kamatuoran.

Gibutyag niini nga sa gipahitabong swab testing niadtong Biyernes, Nobyembre 13, 2020, miguwa ang resulta Nobyembre 14, 2020 sa hapon nga siya positibo sa virus.

Giawhag sa mayor ang mga tawo nga nakatambong ug anaa sa iyang duol panahon sa panagtigom nga mag self-quarantine ug mag-obserba sa ilang panglawas ug mutaho dayon sa duol nga mga health workers kung dunay gipamating sintomas sa sakit. (Dexter T. Visitacion)