GIBUKSAN sa dakbayan sa Davao ang usa ka semana nga Kadayawan Festival pinaagi sa flag ceremony didto sa Quezon Park, kaganinang buntag, Agosto 17.

Mismong si Mayor Sara Duterte-Carpio ang nangulo sa hamubong seremonya uban sa mga Deputy Mayors sa 11 ka tribu sa dakbayan nga mao ang Tausug, Maguindanaon, Iranun, Kagan, Maranao ug Sama, apil na ang lima ka lumad nga tribu nga mao ang Klata, Ata, Ubo Manuvo, Matigsalog ug Tagabawa.

Giawhag ni Mayor Sara ang katawhan nga suportahan ang virtual nga mga aktibidad sa Kadayawan pinaagi sa nagkadaiyang mga media platforms.

Sayo niini, gikanayon sa mayor nga ang mga aktibidad sa ika-35 anyos nga kapistahan ipaagi na sa online gikan karong adlawa hangtud sa Agosto 24 tungod sa hulga sa coronavirus disease (Covid-19) pandemic.

Gitug-an niini sa dihang nahinabi siya sa 87.5 FM DcDR nga ang lokal nga kagamhanan dunay gihan-ay nga pipila ka mga aktibidad nga mahimong makita sa social media.

Gidasig sab sa mayor ang mga ginikanan sa balay nga i-esplikar ngadto sa ilang mga anak ang hinungdan kung nganong gisaulog nato ang Kadayawan Festival - nga kita mapasalamaton sa mga grasya sa maayong ani, ug aron nga masayran nato ang mga kultura sa 11 nato ka mga tribu.