ANG Davao Regional Medical Center (DRMC), ang main Covid-19 referral hospital sa Tagum City, Davao del Norte, mianunsyo nga temporaryo kining dili modawat og tanang klase sa pasyente nga nagkinahanglan og oxygen gumikan sa kakuwang sa supply sa medical oxygen.

"All patients (Covid or non-Covid) referred for admission requiring supplemental oxygen will be assisted for admission to other facilities," sa Facebook post sa DRMC niadtong Martes, Septyember 7, 2021.

"Thus, we encourage you to seek medical attention at the nearest Local Government Unit (LGU) healthcare facility in your area," sumpay sa nasuwat.

Sumala sa DRMC nakasinati sila og kakuwang sa medical oxygen supply.

Tungod niini, nangayo og dipensa ang ospital nga sabton unta sa publiko ug mihangyo sila og kooperasyon samtang ilang gipaningkamutan nga matubag ang maong suliran.

Sumala sa datus sa Department of Health-Davao Region (DOH-Davao) gikan sa Septiyember 6, 2021, ang DRMC adunay 91 gawas sa 111 intensive care unit (ICU) beds nga gigamit samtang 71 sa 189 isolation beds sab ang nagamit samtang 11 sa 19 ka mga mechanical ventilators ang nagamit na sab.

Gikan Septyember 6, ang Davao del Norte dunay 13,132 Covid-19 cases diin sa maong ihap, 1,770 pulos mga active cases, 10,924 ang naka-recovered, ug 438 ang namatay. (Ralph Lawrence G. Llemit)