USA ka maayong kapanaminan niining panahon sa pandemya ang pagdalit og grasya sa mga pamilya nga tumang nanginahanglan, sama sa makita sa mga hulagway.

Milawig sa kadagatan ang mga personahe sa San Pedro Police Station sa panguna sa hepe sa maong istasyon Police Major Jack Tilcag, uban sa mga opisyal sa Barangay 76-A, Bantay Dagat, Fisherfolks Federation ug mga barangay tanods uban sab sa koordinasyon sa PNP Maritime.

Sa maong takna, dungan sa ilang pagpanghatag og mga relief goods sa mga residente, nagpahigayon sab sila og seaborne patrol aron mapabilin ang luwas nga kahimtang sa katawhan duol sa kadagatan.

Komunidad diin asa dunay mga namuyo nga mga Badjao ang gidalitan og mga relief goods labi na sa daplin sa baybayon sa St. John (Dapsa) Purok 12-B sa maong barangay.

Mapasalamaton ang mga residente sa grasya nga dala sa kapulisan di lamang sa pagbantay kanila apan lakip na usab ang pagpahimangno labot sa mga health protocols aron mabatukan ang coronavirus disease. (Jeepy P. Compio)