JAS, Davao Occidental - Dili matukib ang gibating kalipay ni Mayor Jason John Joyce human luwas ug nakagawas na sa ospital ang tanang pasyente sa diarrhea outbreak gikan sa Barangay Butuan sa lungsod.

Kahinumdoman nga mokabat sa 35 ka mga tawo ang nagsuka- kalibang niadtong Disyembre 31, 2020, atol sa bisperas sa Bag-ong Tuig.

Enero 2, gipangdala na sa Tomas Lachica District Hospital ang mga biktima apan usa ka 63-anyos nga lolo ang nakabsan sa kinabuhi.

Apan niadtong Miyerkules, Enero 6, gipahibawo ni Joyce sa iyang Facebook account nga nakagawas na sa tambalanan ang mga biktima.

Gipaabot sa mayor ang iyang kinasing-kasing nga pasalamat ngadt sa katawhang Dabawenyo kinsa abtik nga mitubag sa ilang panawagan nga tabang ug mismong si Congressman Paolo Duterte pa ang unang nagpahatud og hinabang kanila ug gisundan ni Senador Bong Go.

Apil sa mihatag og tabang sa lungsod ang Davao United Responders for Immediate Action Network, katawhan sa Paquibato District, Bureau of Fire Protection-Davao ug uban pang pribadong indibiduwal.

Nahimong malampuson ang pagtabang ug wa na nadugangan ang kinabuhing nakalas human abtik nga miresponde ang Provincial Health Office subay sa mando ni Governor Claude Bautista nga himuon ang tanang paagi aron maluwas ang daghang kinabuhi. (Orlando B. Dinoy)