TULUNAN, North Cotabato -- Giduaw ni Senador Christopher “Bong” Go ang mga biktima sa linog nga gipatapok sa lobby sa municipal hall, Lunes, Oktubre 21.

Banda alas 10 sa buntag, miabot si Go sakay sa helikopter.

Sa pagpamulong sa opisyal, giawhag niini ang mga kapitan sa barangay nga dili pasagdan ang ilang mga biktima sa linog.

Gipasabot niini nga napili niya ang Tulunan ug Magsaysay sanglit daghan ang mga biktima sa linog.

Apan, gipasalig niini nga makaabot ang iyang tabang sa uban pang mga dapit nga naigo sa linog.

Gikan dinhi, milupad na sab ang senador padung sa lungsod sa Magsaysay, Davao del Sur, aron sutaon ang kahimtang sa kapin dos mil ka mga pamilyang apektado.

Gihatagan sab niini og ayudang pinansyal ang mga namatyan nga sakop sa pamilya.

Samtang, tulo ka mga lungsod na sa North Cotabato ang nagdeklara og state of camalamity human sa magnitude 6.3 nga linog, kini ang Makilala, M’lang ug Tulunan.

Sa taho sa Phivolcs, miabot na sa kapin 500 ang mga natala nga afterschocks sa dakong parte sa Mindanao. (Orlando B. Dinoy)