NANAWAGAN karon si Davao City Mayor Sara Duterte-Carpio sa Department of Education (DepEd) Davao Region nga monitoron ang ilang mga estudyante gumikan nakita niini nga dunay mga nagsuroy-suroy.

Atol sa pakighinabi sa dcDR 87.5 FM kagahapon, gibutyag ni Duterte-Carpio nga siya mismo ang nakakita sa mga naglaroy-laroy nga mga estudyante.

"Manawagan mi sa DepEd, ang inyong mga estudyante nag suroy-suroy. Daghan kaayo kog nakita nga mga senior high school/college looking students nag-gimik," sulti sa mayor.

Dugang niini, "Please do something about your attendance sa klase or modules sa mga estudyante especially during class hours. Ayaw na ninyo i-expect nga kami pa sa City Government ang mag gukod-gukod anang mga bata, nga kanang mga bata supposedly handled by DepEd, their college schools, or universities."

Gitumbok sab sa mayor nga sa Buhangin area ang daghang mga nadakpan nga mga masinupakon nga mga minors.

"There is one area in Buhangin. Majority sa nadakpan nato sa violators kay mga minors, mga estudyante nga wala sa balay, nag suroy-suroy sila," ni Duterte-Carpio.

Tungod niini, si Duterte-Carpio naghangyo sa mga tunghaan nga monitor-ron pag-ayo ang ilang mga tinun-an aron di matakdan sa Covid-19. (Jeepy P. Compio)