NAKAGAWAS na gikan sa quarantine facility ang mga kapitan sa Davao City nga gikan sa mga lugar sa National Capital Region (NCR) nga nag-caravan aron manawagan nga padaganon pagka-presidente si Davao City Mayor Sara Duterte-Carpio.

Sa pakighinabi sa mga tigbalita kang Barnagay 23-C Kapitan Alimoden "Wating" Usman, ang nagdumala sa grupong Inday Sara Para sa Bayan 2022, silang tanan negatibo sa swab test results.

Nakagawas na sab sila sa miaging adlaw, diin gilangkuban sa 41 ka mga barangay officials, negusyante ug mga lider sa hut-ong sa katilingban.

Una niini, gibutyag ni Mayor Sara nga duha kini ka batch diin nangabot sa Davao City.

"Duha ni sila ka batch, naa na sila sa atong quarantine facility ug gina-schedule na sila for swab testing, unta walay mag-positive kanila," ingon ni Mayor Sara.

Naglaum sab ang mayora nga di na mahitabo ang gihimo sa mga kapitan gumikan sa panahon sa pandemya hugtanong gidili ang panagtapok.

Hinuon, nagpasalamat ang mayor sa gihimo sa mga kapitan, apan gipasabot niini nga wala sab niya gisirad-an ang kahigayonan ug maghulat siya kung asa dalhon sa kapalaran diha sa natad sa politika. (Jeepy P. Compio)