KIDAPAWAN CITY -- Nagpulong ang tanan nga inter-agency sa gobyerno sa probinsiya sa North Cotabato nga gipangunahan ni acting Governor Emmylou Mendoza ug gihisgutan ang mga dapit nga grabeng gitay-og sa linog.

Sumala ni Jeffrey Perez, supervising science research specialist sa Philippine Institute of Volcanology and Seismology (Phivolcs), nga kinahanglan nga ipatuman ang forced evacuation sa mga landslide-prone area sa probinsiya ug dili na papuy-an.

Mga lugar nga di na papuy-an kinahanglan nga manghikling gilayon kon diin sa lungsod sa Makilala gilangkuban sa mga barangay sa Bato, Buhay, Cabilao, Luayon, Sto. Nino (Purok 1 ug 2) Malabuan (Purok 6), Malungon (Purok 2 ug 7) ug Purok Malaang.

Sa Tulunan, ang Barangay Daig ug dunay bahin sa Barangay Bacong.

Sa M'lang mao ang Barangay New Esperanza (Biao), samtang ang Sitio Agco, Barangay Ilomavis sab sa Kidapawan City.

Gisugyot sa inter-agency nga ibalhin sila sa mas luwas nga lugar ug dili na pabalikon sa pagpuyo sa mga nahisgutang barangay.

Giklaro sa Phivolcs nga dili na gyud papuy-an ang landslide-prone area sa probinsiya.

Daghan na kaayo og landslide sa mga hilit nga dapit sa Makilala ilabi na sa tiilan sa Mount Apo.

Ang pagbalhin sa mga molupyo sa maong mga lugar gipaboran ni Mendoza alang sa ilang kaluwasan gumikan posibleng mahugno ang kabukiran gumikan sa sige og aftershocks lakip na ang ulan nga nasinatian.

Natapos na sab ang paghakot sa duha ka helicopter sa Philippine Air Force sa mga pamilya nga naipit sa landside sa Sitio Kapatagan, Barangay Luayon, Makilala ug gihatud ngadto sa mga luwas nga dapit. (Edgar E. Fuerzas)