BISAN usa ka molupyo nga nanimuyo sa 60 ka mga barangay nga naglatas sa lima-ka-segmento sa Central Davao Fault System nagboluntaryo nga mopahawa o mobakwit bisan pa sa mga pasidaan sa posibleng kadaut sa propedad nga naa sa ibabaw sa fault line.

Kini subay sab sa pamahayag sa opisyal gikan sa City Disaster and Risk Reduction Management Office (CDRRMO).

Ang Department of Science and Technology (DOST)-Philippine Institute of Volcanology and Seismology (Phivolcs), sa pakig-alayon sa CDRRMO, naglista og kinatibuk-ang 60 ka barangay sa Davao City nga nilatas sa Central Davao Fault System, nga gilangkuban sa lima ka segmento.

Ang panag-uban kabahin sa “Walk The Fault” nga kalihukan, gihimo niadtong Hunyo sa niaging tuig, kon diin nagpakabana nga mga ahensiya nilakaw sa fault line sa Bago Oshiro ug Mintal.

Ang aktibidad nagtumong sab sa pagpahibawo sa publiko, ilabi na kadtong nanimuyo sa ibabaw sa fault line, sa ilang kapeligro kon molihok ang maong mga faults.

Ang fault system naglakip sa Tamugan Fault, Lacson Fault, Dacudao Fault, Pangyan-Biao, ug ang New Carmen Fault. Kini nga mga lugar makamugna og magnitude-6 ug taas sa earthquake intensity.

Si CDRRMO training officer Lyndon Ancajas nagsulti nga nagbutang na sila og mga timailhan aron madetermina ang saktong nahimutangan sa mga faults.

Matud niya nga mga molupyo gipasidan-an nang daan nga boluntaryo nga mopahawa o mobakwit tungod kay ang lugar di na luwas nga puy-an.

Apan matud ni Ancajas niadtong Huwebes, Marso 5, nga bisan pa sa kanunay nilang pahimangno gikan sa mga personahe sa CDRRMO kinsa gipakatag sa mga kasikbit nga faults aron pagmonitor sa sitwasiyon, mga molupyo astig kaayo.

“Despite sa among pahimangno sa mga residents nga duol sa faultline nga mag-evacuate or mag-relocate, ang mga tawo dili sila manghawa tungod ginahulat nila tong legal basis,” butyag niya niadtong Huwebes atol sa iSpeak media forum sa City Hall ning siyudad.

Gitumbok ni Ancajas sa “legal basis” mao kadtong city ordinance nga nagdeklara niining mga lugar nga “No Build Zone”.

Hinuon, matud sa opisyal nga ang City Council mahimong moduso og resolsuyon nga nagmando sa mga molupyo nga mobalhin ngadto sa mas luwas nga dapit.

Sa pagkakaron, ang siyudad di makaimposar niini tungod kay wa pay ordinansa nga makapugos kanila sa pagbalhin.

Naglisud sab ang mga molupyo nga makakita og lugar nga kabalhinan tungod di tanan kanila makakaya og balhin og pinuy-anan.

Samtang subling nanawagan si Ancajas alang sa boluntaryong pagbalhin ilabi na nga ang siyudad nakasinati og serye sa linog nga niabot pa og magnitude-6 atol sa katapusang kuwarter sa 2019.