DAVAO DEL SUR -- Gilusad sa Davao del Sur Police Provincial Office (DSPPO) ang proyektong “Double E” (Eye Expedition), kun bag-ong balaod sa pagbutang og dash camera sa ilang mga patrol car.

Usa ka simpleng seremonyas ang gipahigayon sud sa DSPPO, alas 10 sa buntag Biyernes, Oktubre 19.

Sumala ni Senior Superintendent Ferlu Silvio, provincial police director, nga gikinahanglan na sa kapulisan ang mosagop sa bag-ong teknolohiya aron mapalambo pa ang serbisyo sa komunidad.

Dako sab og ikatabang ang mga dash camera sa mga sakyanan kay mahimong makuhaan niini og footage ang mga nag-unang krimen sa kadalanan.

“This is a technological advancement to which the PNP will adopt on the challenge to improve our public service to the community,” asoy ni Silvio.

Giawhag sab niini ang ubang nanag-iya'g 4-wheel vehicles nga magbutang og dash cam alang sa seguridad sa ilang sakyanan. (Orlando B. Dinoy)