KAPALONG, Davao del Norte -- Sikop ang usa ka babaye sa gilusad nga manhunt operation sa kapulisan sa Asuncion Municipal Police Station sa kasong adultery alas 9 sa buntag niadtong Biyernes sa Purok 10-C, Barangay Maniki.

Subay sa journal sa Police Regional Office (PRO)-Davao Region ang suspetsado nailhang si Rosalle Tan-awan Pueblos, alyas Rose, 32, ug residente sa maong dapit.

Nasikop ang suspek pinaagi sa gahum sa warrant of arrest sa kasong adultery dunay criminal case number 2200-17 nga gipagula ni Honorable Judge Gemma Betonio sa Municipal Trial Court (MTC) sa 11th Judicial Region sa Asuncion, Davao del Norte.

Mokantidad sa P12,000 ang mamahimong ipiyansa sa dinakpan alang sa iyang temporaryo nga kagawasan.

Sa kasamtangan, ang suspek temporaryo nga gikustodiya sa Asuncion Municipal Police Station kinsa naghulat sa sunod mando sa korte labot sa iyang kaso. (Jeepy P. Compio)