MGA molupyo duol sa Tagakpan Public Cemetery sa Tugbok District, Davao City nagpadayag og kabalaka nga posibleng magkasakit sila tungod sa sementeryo nga giandam sa siyudad alang sa nangamatay sa Covid-19.

Si Lance, di tinuod niyang ngalan, nagsulti sa SunStar Davao pinaagi online nga nabalaka sila sa posibleng pagsulbong unya sa mga kaso sa Covid-19 sa ilang barangay.

Matud niya nga nabalaka siya sa kaluwasan sa iyang pamilya. Nagpuyo lang sila pipila lang ang gilay-on gikan sa sementeryo.

"Basin pwede pa mabalhin ning mass grave sa ubang lugar, kanang wala untay duol nga residential area. Mao ra amo hangyo," hangyo ni Lance.

Nakig-istorya sab ang SunStar Davao sa pipila ka mga molupyo sa lugar. Apan mihangyo sila nga di panganlan o kaha irekord.

Usa ka babayeng molupyo, kinsa nagpuyo kilid lang sa Tagakpan cemetery, niangkon nga nabalaka sila sa posibleng pagkaladlad sa lugar nga nakotaminahan na sa kagaw sa panahon nga sugdan na sa siyudad ang paglubong sa mga pasyente nga namatay sa Covid-19.

Nabalaka sab siya nga basin makaapekto kini sa iyang negusyong tindahan.

Samtang nakasabot si Covid-19 Task Force spokesperson Dr. Michelle Schlosser sa sentimento sa mga molupyo sa dapit. Apan matud ni Schlosser nga ang siyudad nag-andam og health and safety guidelines kung sugdan na ang operasyon sa sementeryo sa dapit.

"Dili man na i-allow sa City Government of Davao, dili pud na siya i-allow sa DOH [Department of Health], sa City Health [Office], labi na sa atong Covid[-19] Task Force headed by our mayor, to contaminate the area," tin-aw sa opisyal sa Task Force sa paghinabi kaniya sa 87.5 FM Davao City Disaster Radio. (RGL)