MAGUINDANAO -- Giangkon karon sa pamunoan sa Moro Islamic Liberation Front (MILF) nga dakong hagit sa bag-ong Bangsamoro government ang padayon nga pagsupak sa uban nga Moro leaders sa Mindanao.

Matud ni Moro Islamic Liberation Front (MILF) Vice Chairman Ghadzali Jaafar, dili dali ang pag-organisa sa Bangsamoro Autonomous Region in Muslim Mindanao (BARMM).

Ilabina kadtong mga lider sa mga Moro nga dili pabor sa mugnaon nga Bangsamoro Government nga pagapangulohan ni MILF Chairman ug Interim Chief Minister Aljads Murad Ibrahim.

Nagpadayon ang pakigdayalogo sa MILF sa mga Moro Leaders nga supak sa Bangsamoro Organic Law (BOL) aron mapasabot sa ilaha ang gipursige nga pagbag-o sa Bangsamoro Region.

Apan kung dili gyud sila pabor, dili pud sila pugson gumikan ang ilang tumong nga dunay kaugalingon nga otonomiya ang Bangsamoro.

Nanghinaot si Jaafar nga positibo ang tubag sa mga Moro leaders gumikan dili nila kini kaugalingong interes apan sa tanan.

Giseguro sa opisyal nga bisan lisud ang ilang kagian nga transisyon, apan magdala kini sa kabag-ohan sa tanan nga Moro, Lumad ug Kristiyano.