KIDAPAWAN CITY -- Nalagpot ug nakabsan sa kinabuhi ang usa ka negusyante, samtang laing duha ka tawo ang naangol sa pagbalintong sa sa multicab alas 9:15 sa buntag, Martes, sa M'lang, North Cotabato.

Giila ang namatay nga si Arnold Papa-an, 40, minyo, buy and sell trader, samtang naangol mao sila Ronald Papa-an, 21, ug Angel Fuentes, 18, mga molupyo sa Barangay Libo-o, M'lang.

Sumala kang Bernardo Tayong, Municipal Disaster Risk and Reduction Management officer, nga paingon unta sa sentro nga bahin sa lungsod ang mga biktima nga sakay sa multicab nga dunay karga nga kahoy.

Apan samtang pasaka na sa aspaltong bahin sa national highway ang multicab sa Barangay Bagontapay, kalit lang mitakilid kini ug nabalintong.

Nalagpot kilid sa kalsada si Arnold ug nabunal ang ulo sa semento.

Nadala pa siya ngadto sa M'lang District Hospital apan gideklara siya sa doktor nga dead on arrival.

Samtang nagpaalim na ang duha pa niya ka kauban sa balay tambalanan human makaangkon og pangos, bun-og, bali ug samad sa ilang kalawasan.

Nagpahimangno ang M'lang Municipal Police Station sa mga drayber nga mag-amping sa pagpamaneho sa ilang sakyanan ilabi na sa mga accident prone area sa lungsod. (Edgar E. Fuerzas)