COTABATO CITY -- Personal nga atraso ang gilantaw nga motibo sa pagpatay sa usa ka empleyado sa gobyerno alas 7:45 sa buntag niadtong Lunes, Hulyo 16, sa dakbayan.

Giila ang biktima nga si Tato Gumbila, 44, nagpuyo sa Cotabato City ug municipal treasurer sa Kabuntalan, Maguindanao Province.

Gibutyag ni Senior Superintendent Rolly Octavio, Cotabato City Police Office director, nga nahitabo ang pagpamanhig samtang sakay ang biktima sa iyang kotse gikan sa gipuy-an niini ug paingon na unta sa trabaho.

Apan pag-abot ni Gumbila sa Sinsuat Avenue, kanto Gonzalo Javier Street, Barangay Rosary Heights 7 sa siyudad, kalit lang mipatim-aw ang duha ka wala mailhing lalaki ug dayon nagpusil kaniya gamit ang kalibre .45 nga pistola.

Patay gilayon si Gumbila nga nakaangkon og igo sa nagkadaiyang bahin sa lawas samtang mga mamumuno daling miikyas sakay sa motorsiklo nga walay plaka paingon sa hilit nga dapit sa siyudad.

Padayon pang mihimo og dugang imbestigasyon ang kapulisan sa CCPO. (Edgar E. Fuerzas)