KIDAPAWAN CITY -- Moabot na karon sa 200 ka mga mag-uuma nga nagbuhi og mga baboy ang apektado sa African Swine Fever (ASF) sa M'lang, Cotabato Province.

Kini maoy nasayran ni Municipal Disaster Risk Reduction and Management (MDRRM) Officer Bernardo Tayong ug nagkanayon nga moabot na og 884 ka mga buhing baboy ang gipailawom sa depopulation.

Apil sab niini ang mga binuhing baboy nga 500-meter radius sa mga barangay nga naigo sa ASF. Tumong niini nga malikayan ang pagkuyanap sa kagaw sa mga baboy.

Samtang duna na'y mga hog raisers sa M'lang ang nakadawat na og financial assistance gikan sa gi-aprobahan nga Quick Response Fund.

Moabot sa upat ka barangay sa lunsod ang grabeng giigo sa ASF ug hugot nga gibantayan sa mga tanod.

Nanawagan ang lokal nga panggamhanan sa M'lang ngadto sa mga magbababoy nga itaho dayon kung dunay mga mag-uuma nga magdumili sa pagpailawom sa culling o depopulation activity.