TACURONG CITY -- Grupo sa Bangsamoro Islamic Freedom Fighters (BIFF) ang gitudlo nga namomba alas 7:05 sa buntag Sabado, Septyembre 7, sa merkado publiko sa

Isulan, Sultan Kudarat.

Walo ka mga tawo gilayon ang giingong nangaangol nga gipang-ila nga sila Nasim Gulano, Jarren Limani Amigo, Nino Binas Virgo, Tenecio Cagadas Jr., Jerald Cartajena, Jay Carnazo, Joemar Aquino, ug Richard Arancillo.

Matud ni Isulan chief of police Lieutenant Colonel Joven Bagaygay, nibusikad ang improvised explosive device (IED) sa nagtapok nga motorsiklo atbang sa merkado sa Barangay Calawag 3 sa lungsod.

Gihulagway sa mga awtoridad nga ang IED ginama sa mga lansang, blasting cap, pulbura ug cellphone isip triggering mechanism.

Gitabang gilayon ang mga naangol sa mga nagrespondeng pulis ug gihatud ngadto sa Sultan Kudarat Provincial Hospital.

Gitaho nga uban sa mga biktima nangalagpot sa kakusog sa pagbusikad ug halos mabungog ang mga tawo nga duol sa nahitaboan.

Kahinumdoman nga niadtong miaging tuig tulo ka mga bomba ang gipabusikad sab sa lungsod.

Grupo ni Shiek Esmail Abdulmalik alyas Kumander Abu Toraife sa BIFF-Isis inspired group ang gitudlo nga suspek sa pinakauling pagpamomba sa Isulan.

Seguridad sa lungsod subling gihugtan. (Edgar E. Fuerzas)