WALAY kabutangan sa pagsubo sa ginikanan sa ulitawo nga na-missing diin patay na nila kining nakita ug anaa na sa pagkadugta nga naglutaw sa South San Juan, Barangay Centro Agdao, Huwebes sa hapon, Pebrero 22.

Ang biktima giila nga si Clark Jason Casayuran, 24, nagpuyo sa Agdao District, Davao City.

Dihang napalgan ang patay nga lawas sa biktima, gilayon kining giila sa iyang mga ginikanan.

Nasayran nga niadtong Martes, ang biktima ug usa pa niya ka kauban ang nanagat sakay sa ilang bangka, apan giingong natuwad ang ilang bangka sa kakusog sa balod sa lawod.

Ang kauban sa biktima nga si alyas Rodel, ang nakaluwas kinsa nabangalan sa miresponde nga mga sakop sa Central 911 Urban Search and Rescue (USAR) team.

Milabay ang tulo ka adlaw, ayha pa napalgan ang biktima ug ning kasamtangan gipahaluna na ang patay nga lawas niini.