DEAD on the spot ang usa ka lalaki kinsa nagsaulog sa iyang adlaw'ng natawhan human pusila sa iyang igsuon nga lalaki alas 6 sa gabii niadtong Oktubre 20, 2021 didto sa Barangay Fatima, Paquibato District, Davao City.

Giila sa kapulisan ang biktima nga si Dennis Sulla Cabunilas, 40-anyos, kanhi miyembro sa New People's Army (NPA) ug molupyo sa dapit.

Nasayran nga nagsaulog sa iyang birthday ang biktima dihang kinsa nakigtagay pa kini sa iyang igsuon nga si Larry Sulla Cabunilas, 48-anyos kinsa mao ang suspek.

Una niini ang biktima mihangyo sa suspek nga motahan sa awtoridad isip giingong pagka-miyembro niini sa mga rebelde.

Nasuko suma pa ang suspek hinungdan nga mikuha kini og pusil dayon gipusil ang igsuon.

Sa report sa Paquibato Police, ang biktima usa ka former member sa rebelde ubos sa Pulang Bagani Command (PBC) 1, Southern Mindanao Regional Command (SMRC) nga dunay code name "Ka Dennis/Jingoy" ug dunay standing warrant of arrest sa kasong Murder ug Attempted Murder.

Ang suspek usa sab ka former member sa rebelde ubos sa PBC1, SMRC nga naay code name "Ka Larry" nga dunay standing warrant of arrest sa kasong murder, grave threats ug arson.

Ang patay nga lawas sa biktima gidala sa Rivera Funeral Parlor sa Licanan, Lasang, Davao City samtang ang suspek gawasnon ning kasamtangan. (Jeepy P. Compio)