NAGPA-BLOTTER sa kapulisan sa Sta. Ana Police Station ang usa ka saleslady human giingong gihagit og pakighilawas sa nakapunit sa iyang selpon, Sabado sa gabii, Mayo 26.

Una niini, ang reklamante nga si alyas Lady, 32-anyos, misulod sa usa ka club ug nag-disco uban ang iyang mga barkada sa Jose P. Laurel Avenue.

Giingon nga samtang nalingaw sila sa ilang pagsayaw, gibutang niini sa bulsa ang iyang selpon, ug sa kalami sa budots nga sonata ug sa kiay-kiay, ulahi na niini nabantayan nga nahulog iyang selpon ug ilaha kining gipangita apan wala nakit-an.

Sa dihang ilang gitawagan ang selpon, usa ka lalaki ang nakatubag, ug sa dihang iya kining gihangyo nga ibalik kaniya, misugot ang lalaki nga ibalik, apan dunay kondisyon nga mag-sex sila.

Gani, nag-text pa ang maong lalaki nga didto sila magkita sa San Pedro Street, kaadlawon sa samang adlaw.

Sa kahadlok sa babaye, miadto kini sa Sta. Ana PNP aron ipatala ang maong panghitabo.

Dugang sa biktima nga naa pa'y mga sinsitibong mga hulagway sud sa maong selpon mao nga nabalaka siya.