NAHANAW ang motorsiklo sa usa ka mag-uuma nga nag-file sa iyang Certificate of Candidacy (CoC) alas 9:35 sa buntag niadtong Biyernes., Abril 20, didto sa Midsayap, North Cotabato.

Giila ang biktima nga si Louie Francisco Enid nga nagpuyo sa Barangay San Isidro, Midsayap, North Cotabato.

Gibutyag ni Midsayap Chief of Police Superintendent Gilbert Tuzon nga samtang nag-file sa iyang CoC si Enid sa Municipal Comelec Office sa Midsayap, iyang gibilin ang motor niini atbang sa municipal hall.

Sa diha nga nahuman na ang mag-uuma sa iyang CoC filing, gibalikan niya ang motor nga iyang gi-parking.

Dako ang kakurat ni Enid gumikan nahanaw ang bag-o niya nga XRM-125 nga motorsiklo kolor pula.

Abtik nga gitaho sa mag-uuma ang gikawat niya nga motor ngadto sa kapulisan sa Midsayap apan wala na nakita.

Gisusi na sa mga awtoridad ang closed circuit television (CCTV) camera atbang sa munisipyo sa Midsayap aron matumbok ang nagkawat niini samtang nagpadayon sab ang ilang imbestigasyon. (Edgar Fuerzas)