ARAKAN, North Cotabato -- Patay ang usa ka turista human mahulog sa busay samtang nag-selfie alas 11:30 sa buntag niadtong Lunes, Pebrero 18.

Naila ang biktima nga si Hercules “Edgar” Monreal, 21, molupyo sa Barangay Catalunan Grande, Davao City.

Gibutyag ni Arakan Chief of Police Jose Marie Molina nga naligo ang biktima uban ang iyang mga barkada ug mga igsuon sa Matigol Falls sa Sitio Inamong, Barangay Datu Ladayon, Arakan.

Misaka, matud pa, si Monreal sa taas nga bahin sa Matigol Falls, nag-selfie apan kalit nga nadalin-as hinungdan nga nahulog paubos sa busay 100 ka tiil ang gitas-on.

Gitabang ang biktima sa iyang mga kaubanan ug gidala sa Rubillo Hospital sa Calinan, Davao City apan nakabsan kini sa kinabuhi.

Naka-angkon ang ulitawo og daghang mga bun-og, bali ug pangos sa nagkadaiyang bahin sa lawas nga maoy hinungdan sa iyang kamatayon.

Una nang nagpasidaan ang LGU-Arakan sa mga turista nga mangaligo sa Matigol Falls nga mag-amping aron dili madisgrasya. (Edgar E. Fuerzas)