SAMARAN ang duha ka tawo sa pagbuto sa usa ka improvised burner alas 3:25 sa hapon, Sabado, Nobyembre 27 sa probinsya sa Cotabato.

Ang mga biktima mga molupyo sa Barangay Doroluman, Arakan, North Cotabato.

Sa taho gikan sa Arakan Municipal Police Station, samtang nagluto sa ilang ibaligya nga prito nga karneng manok ang mga biktima gamit ang improvised burner, kalit lang kining mibusikad.

Tungod sa kakusog sa pagbuto, naangol ang usa ka menor de edad ug iyang inahan.

Mituasik nga daw naligo sa mag-inahan ang nagbukal-bukal nga mantika ug naigo sa mga tipaka sa improvised burner nga miigo sa ilang lawas, hinungdan nga sila nasamdan ug napaso.

Gisapupo sa mga silingan ang mga biktima ug gisakay sa ambulansya sa local government unit sa Arakan diin sila gipangdala sa balay tambalanan.

Luwas na sa makuyaw nga kahimtang ang mag-inahan nga padayon nga nagpaalim sa ilang mga samad ug paso.

Sa kasamtangan ang kapulisan ug Bureau of Fire Protection-Arakan ang padayon nga nag-imbestiga kalabutan sa maong insidente.