WALA nay kinabuhi nga nakit-an sa covered court sa Rolling Hills Subdivision, Bacaca, Barangay 19-B, Davao City ang usa ka lalaki alas 8:30 kagahapon sa buntag, Hulyo 19.

Subay sa spot report sa San Pedro Police Station, nailhan ang biktima nga si Gilbert (bansahon gitago), 57-anyos, usa ka maintenance crew, ug residente sa Apo St., Rolling Hills Subdivision.

Ang silingan maoy nakakita sa biktima nga wala nay kinabuhi, hinungdan nga mipahibalo kini sa mga opisyal sa barangay.

Gilayong miabot ang medical team sa Central 911 kinsa maoy mideklara nga patay na ang biktima.

Nasayran nga taud-taod na sab nga naghambin sa balatian ang biktima ug duna nay mga higayon nga mosulay kini og kutlo sa kinabuhi.

Sa imbestigasyon sa kapulisan sa San Pedro, wala silay nakita nga foul play sa hitabo.

Gilayong miabot sa nahitaboan ang taga Operation Center sa Covid-19 sa Davao City Dr. Rucelle Billanes alang sa pagsubay sa patay'ng lawas una kini gipadala ngadto sa Angel Funeral Homes alang sa tukmang disposasyon.

***

Kung ikaw may kailang nanginahanglan og tabang, o ikaw mismo nanginahanglan og masultihan sa imong gihambin nga emosyon, mamahimo nimo ni sila nga makontak:

DOH SUICIDE PREVENTION HOTLINES:

0917-899-8727 (USAP)

0917-989-8727 (USAP).