STA. MARIA, Davao Occidental -- Nasikop na sa kapulisan ang lalaking suspek sa pagpanunggab patay sa iyang silingan sa Barangay Mamacao niadtong Sabado, Disyembre 29.

Unang nag-viral sa social media si Wangyo Tribunal, 18, human miikyas sa krimen apan nasikop niadtong bisperas sa Bag-ong Tuig didto sa Manila.

Si Tribunal maoy gitudlong suspek sa pagdunggab og 20 ka higayon sa nagkadaiyang bahin sa lawas ni Jane Masukol, 18, kinsa nahiagom sab og samad dinukdukan sa martilyo ang ulo.

Nag-inusara lang sa ilang balay ang biktima dihang nahitabo ang krimen ug nabangalan kini nga naligo sa kaugalingong dugo.

Nanaghap ang mga kabanay sa biktima nga nagplano nang daan ang suspek nga luguson ang biktima sanglit una kining nangutana sa iyang mga higala kon pila ka tuig mabilanggo ang kasong rape.

Apan, gilimod ni Tribunal nga iyang luguson ang biktima sanglit iya lamang daw gihadlok tungod kay ginasungog siya niini nga kawatan og manok.

Gibutyag niini nga giilog sa biktima ang kutsilyo maong gidepensahan niya ang kaugalingon apan nahinaykan ang dalaga.

Milutaw sa resulta sa otopsiya nga wa malugos ang biktima.

Gumikan sa insidente, gitakdang mopauli sa nasud ang overseas Filipino worker nga inahan sa biktima. (Orlando B. Dinoy)