COMPOSTELA, Davao de Oro -- Gituohang wa maantos sa usa ka ulitawo ang sitwasyon kinsa nagpakamatay kini sa haya sa babaye nga iyang gihigugma.

Ang insidente nahitabo didto sa Sitio Lubog, Barangay Ngan, Compostela.

Giila sa otoridad ang biktima nga si Lan Cayug, ulitawo, 22 anyos, trabahante sa plantasyon sa sagingan ug residente sa nahisgutang dapit.

Subay sa report, alas 2:48 sa udto niadtong Lunes, usa ka Emily Sanchez Pamugas, 35 anyos, ang mitaho sa Compostela Municipal Police Station labot sa maong insidente.

Base sa inisyal nga imbestigasyon, alas 4:00 sa kaadlawon sa samang adlaw, namatikdan ang biktima nga nangurog ug nahagba sa salog atubangan sa haya sa iyang hinigugma nga si Rosejane Guingayan kinsa namatay niadtong Hunyo 22, 2020 gumikan sa sakit.

Matud pa nga dayong giduol ang biktima ug gisusi ang nahitabo kaniya diin nasuta nga nanimaho kining pestisidyo.

Gibutyag nga dayong gitawagan sa pamilya sa biktima ang Compostela Emergency Response Team ug gidala ang biktima Davao De Oro Provincial Hospital sa lungsod sa Montevista apan gideklarang dead on arrival sa doctor nga mihiling.

Ang patay'ng lawas sa biktima gipahiluna sa Funeraria De Alar sa Purok 2, Barangay Poblacion, Compostela.