KIDAPAWAN CITY -- Dugta ug nanimaho nang nakaplagan ang mga patay nga lawas sa mag-uyab human giingong nagtaban alas 4:00 sa hapon, Dominggo, Pebrero 28, 2021, didto sa Alamada, North Cotabato.

Giila ang mga biktima nga sila Jamil Mamarinta, 30, ug Princess Pama, giingong menor de edad, nga pulos molupyo sa Barangay Rangayen sa nahisgutang lungsod.

Gibutyag ni Alamada Chief of Police Major Sunny Leoncito nga mismo mga molupyo sa maong barangay ang nakadiskubre sa nangalisngaw na ang baho sa patay nga lawas sa mga biktima.

Apan hangtud sa pagsuwat ning balita, wala pa masuta sa mga opisyal sa barangay ug mga awtoridad ang hinungdan sa ilang kamatayon.

Una na nga nanawagan ang pamilya nila Pama ug Mamarinta sa kalit nilang pagkahanaw sa ilang dapit gumikan nagtaban ang mag-uyab mga kapin 20 ka adlaw na ang nakalabay.

Padayon pa ang imbestigasyon sa kapulisan sa Alamada Municipal Police Station aron nga masayran kung gituyo ba ang kamatayon sa mga biktima.