DAVAO DE ORO -- Tugpa sa balay tambalanan ang usa ka lalaki nga nadat-ogan ang lawas sa troso nga iyang gihakot didto sa Purok Ceboley, Barangay Banlag, Monkayo alas 11:00 sa buntag, Martes.

Ang biktima mao si Jonnie Patalino, Falcata hauler ug molupyo sa Purok Palina, Barangay San Isidro sa nahisgutang lungsod.

Subay sa report, nasayran nga ang biktima nanghakot og troso nga Falcata gamit ang iyang skylab nga motorsiklo.

Apan pag-abot sa nahisgutang dapit, nawad-a'g kontrol ang gimaneho niyang motorsiko gumikan sa kalisud sa dalan.

Matud pa nga natumbahan ang biktima sa motor ug ang usa ka troso sa Falcata nga iyang karga, miligid ug midat-og sa iyang lawas nga miresulta sa pagkasamad ug pagpaminhod sa ubos nga bahin sa iyang lawas.

Ang biktima gidali pagdala sa pinakaduol nga balay tambalanan.

Hinuon, naa na karon sa luwas nga kahimtang ang biktima nga padayong nagpaalim sa samad ug bun-og nga iyang nahiaguman. (Dexter T. Visitacion)