HAGONOY, Davao del Sur -- Nasikop na sa kapulisan ang usa ka lalaking giingong mamaklaray ug nanghimas og babaye ug giila nga most wanted person sa lungsod subay sa orden de aresto, alas 5:30 sa hapon niadtong Lunes, Enero 14.

Si Chief Inspector Gil Arobo, hepe sa kapulisan sa Hagonoy Municipal Police Station, nag-ila sa dinakpan nga mao si Jeffrey Matanggo Limbong, 27, ulitawo, ug drayber sa Barangay Aplaya sa maong lungsod.

Matud ni Arobo nga anaa sa number 8 most wanted sa lugar ang dinakpan ug dihang nasiplatan didto sa Sitio Lagaylay, Barangay Cadaatan, lungsod sa Sta. Maria, Davao Occidental gilayong gipusasan.

“Mamaklaray daw ni siya sa ilaha unya daghan na ni og gibiktima pero kining complainant nga iyang gisulod sa balay ug gihimas mao gyud ang nangusog nga kasuhan siya,” asoy ni Arobo sa SunStar Superbalita.

Ang suspek nag-atubang og kasong “acts of lasciviousness” nga giduso didto sa Second Municipal Circuit Trial Court Matanao-Hagonoy ug gilagdaan ni presiding Judge Cherry Ann Chamen-Paronda.

Anaa na sa kustodiya sa kapulisan ang suspek samtang gihuwat nga moguwa ang commitment order gikan sa korte.