COTABATO CITY -- Dumot sa pamilya o rido ang gilantaw sa mga awtoridad nga motibo sa pagpamanhig sa usa ka lokal nga opisyal ug mga kaubanan niini alas 8:15 sa buntag niadtong adlaw nga Lunes sa probinsya sa Maguindanao.

Giila ang napatay nga si Morsid Midtimbang Lauban, 40 anyos, minyo, kinsa usa ma Municipal Councilor sa Guindulungan, Maguindanao.

Samdan sab sila alyas Wahid ug alyas Kamsa, mga security escort sa konsehal nga paryente niya.

Kahinumduman nga sakay ang mga biktima sa Toyota pick-up nga gimaneho ni Lauban gikan sa Cotabato City paingon sa iyang trabaho aron mutambong sa flag raising.

Apan pag-abot nila sa Tambunan Bridge sa utlanan sa Talayan ug Guindulungan, kalit lang mibutho ang mga armadong tawo ug girakrakan ang gisakyan ni Lauban gamit ang mga tag-as nga matang sa armas.

Abtik sab nga miikyas ang mga suspetsado sakay sa usa ka multicab paingon sa hilit nga dapit sa Talayan Maguindanao.

Dead on the spot si Lauban nga natusak-tusak sa bala ang iyang lawas samtang nadala sa Cotabato Regional and Medical Center sa Cotabato City ang duha niya ka samaron nga paryente.

Gikanayon sa pamilya sa mga biktima nga natumbok na nila ang mga namanhig niini apan ilang isalig sa kapulisan ang imbestigasyon ug pagdakop aron sila kasilutan sa balaod.

Sa kasamtangan, ang kapulisan sa Guindulungan ug Talayan Maguindanao ang padayon nga nag-imbestiga kalabutan sa maong hitabo. (Edgar Fuerzas)