SELOS sa magkaribal sa gugma ang gilantaw nga motibo sa mga awtoridad sa pagpusil-patay sa ulitawo alas 11:15 sa buntag, Sabado, Hunyo 19, 2021, sa Datu Montawal, Maguindanao Province.

Giila ang biktima nga si Mamanaot Guial Kapal, 24, ug nagpuyo sa Barangay Pagagawan sa maong lungsod.

Matud ni Maguindanao Provincial Police Office Director Colonel Donald Madamba nga sakay ang biktima sa iyang motorsiklo gikan namisita sa iyang hinigugma sa Barangay Bulit sa maong lungsod ug pauli na unta sa ilang balay.

Apan sa dihang niabot na siya sa tulay sa Barangay Pagagawan sa nahisgutang lungsod, kalit siyang gipusil sa riding in tandem suspects gamit ang kalibre .45 nga pistola.

Patay gilayon ang ulitawo human maigo sa ulo ug likod nga bahin sa lawas samtang mga mamumuno dali sab nga miikyas padulong sa Kabacan, North Cotabato.

Nasayran nga sa wala pa ang hitabo, dunay nadawat ang biktima nga hulga sa giingon nga iyang karibal sa hinigugma.

Kapulisan sa Datu Montawal Municipal Police Station padayon pang nagsubay sa hitabo aron nga mailhan ang mga mamumuno. (Edgar E. Fuerzas)