NAMENTERYO ang usa ka tricycle driver nga suspek sa kasong rape human kini alegasyong misukol sa dihang arestuhon sa mga sakop sa San Pedro Police Station niadtong Biyernes, Hunyo 2, didto sa Barangay 76-A, Bucana, Davao City.

Ang San Pedro police nag-ila sa suspek nga si alyas Dennis, 37, ug mulopyo sa maong lugar.

Sumala ni Police Major Marvin Hugos, station commander sa San Pedro Police Station 2, nga gireklamo ang suspek sa anak sa iyang kapuyo nga ming-abuso kaniya.

Saysay sa 12 anyos nga nailhang si alyas Jane, Grade 4 pupil, nga alas 8 sa buntag, Biyernes, Hunyo 2, samtang natulog siya sulod sa kuwarto, gisulod siya sa iyang ama-ama ug alegasyong gi-molestiya.

Gilayong giadtoan sa mga sakop sa Women and Childrens Protection Desk aron dakpon ang suspek apan, imbis mokuyog, mibunot kini og .38 caliber revolver hinungdang napugos ang pulis sa pagniyutralisa kaniya.

Gidala ang suspek sa Southern Philippines Medical Center apan gideklara kining dead on arrival.